阿信屋 睇長線

759_Store_in_Olympian_City_2015-700x471

其實我一直都好鍾意去759阿信屋買野,其實有時覺得佢地小食款式都多過而家個兩大超市,間中都賣得幾平,又近屋企樓下。不過最近一個半月都冇乜點買,到左父親節,阿信屋做返「689折」,我先至買返啲。

早兩個星期就去左阿信屋買野,發覺產品組合又變左啲。如果你一直幫襯開阿信屋既話,你會發覺而家日本來貨既比例細左好多,取而代之就係台灣貨同歐洲貨。大家喺台灣睇到既台啤,或者有排網上好hit既花雕酸菜牛肉杯麵或花雕雞麵,阿信屋都入左唔少貨。相比台灣賣緊價錢,杯麵喺香港呢邊其實溢價唔少,即使做折,通常都只係會做8折或9折,先同台灣賣緊既原價差唔多。但啤酒(水果啤)黎講,就平過台灣20%左右。入台灣貨,其實最重要係匯率差唔多,未必有好大既升跌幅。雖然一年內港幣對新台幣由1:3.8跌到1:4.2左右,但相比日圓既波動程度,當然係好濕碎啦。

睇返阿信屋母公司CEC國際控股業績,營業額升10%,但除稅前溢利就跌成半。咁跌法,當然同租金上升同經營成本上升有關,經營成本最主要就來自匯率問題。做零售呢行,最怕就係買開既貨愈來愈貴,一來冇得加價,二來如果換走左啲貨,熟客就未必會再幫襯啦。上星期出盈警話上年度全年虧損,單係投資物業公平價值就蝕約973.2萬(即係舊年九成盈利)。加埋日圓匯率係咁升,毛利率持續探低,2015/16年度個半年業績毛利率得返0.64%,毛利率彈唔起,759想升都難。

不過咁,而家旺區舖頭租金開始減,再加埋貨品組合重組緊,759應該差極有個譜。759喺2013年12月新高做過$4.99,而家跌到得返9毫,插足八成,返到2013年2月水平。出埋業績,最多都只會再跌返去2012年尾,大概5毫、6毫水平。相近類型既零食物語(母公司四州控股),上個月都預告左業績會跌60%-70%,但股價都升到10%,由2014年1月高位5.84都只係跌左四成,CEC明顯跌得太盡。最近睇返阿信屋因為打折頭,門市見返人龍,我覺得759出埋業績後,應該可以睇下長線,博毛利率反彈。

文若

(原文刊於全民媒體網頁)